Framboð til stjórnar

Ég heiti Arnar Snæberg Jónsson og ég býð mig fram í stjórn á aðalfundi Siðmenntar þann 18. mars nk.

Ég er 45 ára Strandamaður og bóndasonur, búsettur í Hafnarfirði. Fjögurra barna faðir og maðurinn hennar Hildar. Ég er tómstunda- og félagsmálafræðingur og starfa núna sem vefstjóri hjá Landsvirkjun eftir áratug sem verkefnastjóri hjá Reykjavíkurborg. Pönktónlistarmaður og alls konar annað í hjáverkum, lífsglaður og opinn en fer líka til sálfræðings til að tækla þunglyndi og miðaldrakrísur (mæli með!)

Ég gekk í Siðmennt upp úr 2015 eftir að hafa kynnt mér húmanisma í þaula og komist að því að hann endurspeglar mína lífssýn fullkomlega.
Ég er búinn að vera athafnastjóri í tæplega fimm ár. Það eru algjör forréttindi - mest gefandi vinna sem ég hef fengist við um ævina.
Ég hef setið í athafnaráði Siðmenntar síðan 2019 og er formaður ráðsins í dag. Þar hef ég kynnst innra starfinu vel, skipulagt og framkvæmt alls konar viðburði, komið að nýliðaþjálfun og margt fleira. Fyrst og fremst hef ég þó kynnst fjöldanum öllum af frábæru fólki og eignast góða vini. Fyrir það er ég óskaplega þakklátur

Í gegnum vinnuna fyrir Siðmennt hef ég áttað mig á því að tækifærin fyrir félagið til að vaxa og dafna og blómstra eru óteljandi. Ég vil leggja mitt af mörkum til þess að svo megi verða og þjóna Siðmennt enn betur með stjórnarsetu.

Ég, Kristín Helga Schiöth, býð mig fram til áframhaldandi stjórnarsetu fyrir Siðmennt; ég er að ljúka mínu fyrsta ári sem aðalmaður og árið þar áður sat ég sem varamaður í stjórn. 

Ég er 35 ára, menntuð í heimspeki og alþjóðafræðum og starfa sem verkefnastjóri í umhverfis- og loftslagsmálum. Ég er búsett á Akureyri ásamt fjölskyldu minni og sinni þar fermingarfræðslu fyrir Siðmennt fyrir börn á Norðurlandi. Mér þykir afskaplega vænt um Siðmennt og hef verið félagi frá því ég lét sjálf ferma mig borgaralega fyrir ansi mörgum árum síðan. 

Ég er stolt af þeim vönduðu athöfnum sem Siðmennt framkvæmir og þykir mikilvægt að fólk hafi val þegar kemur að nokkrum mikilvægustu stundum í þeirra lífi. Starfsemin hefur farið vaxandi undanfarin ár og áhersla verið lögð á að styðja við athafnir utan höfuðborgarsvæðisins, það vil ég gjarnan halda áfram að gera. Ég hef auk þess sérstakan áhuga á að bæta aðgengi fólks að veraldlegri eða húmanískri sálgæslu, t.a.m. við veikindi á sjúkrahúsum eða dauðsföllum. 

Kæru félagar. Ég býð mig hér með fram til endurkjörs í stjórn Siðmenntar - Félags siðrænna húmanista á Íslandi á aðalfundi (Aðalfundur Siðmenntar 2023) sem fer fram þann 18. mars 2023.

Ég er tæplega 49 vetra ungur maður alinn upp að mestu í Reykjavík og hef verið félagi í Siðmennt frá 2012. Ég lauk námskeiði fyrir nýja athafnarstjóra haustið 2013 hef starfað sem athafnastjóri félagsins síðan þá. Þar að auki var ég athafnastjóri í Noregi hjá HEF - systursamtökum Siðmenntar í Noregi í 2 ár.  Síðust tvö ár hef ég verið ritari stjórnar Siðmenntar og býð því áfram fram krafta mína til starfa fyrir félagið.
 

Ég sat áður í stjórn tveggja félaga HEF (Drammen og Buskerud) um 3 ára skeið og hef reynslu af uppbyggingu lífskoðunarfélaga bæði landshluta og á landsvísu. Ég flutti 2020 til Íslands eftir 7 ára búsetu í Noregi og starfa í dag sem sérfræðingur í upplýsingatækni hjá Reykjavíkurborg. 

Þar sem ég hef mikinn áhuga á starfi, tilgangi og stöðu Siðmenntar í íslensku samfélagi að þá langar mig til að leggja mitt á vogarskálarnar til að styrkja og byggja upp félagið næstu árin. 

Ég vill auk þess í störfum mínum störfum fyrir félagið leggja áherslu á að efla kynningu Siðmenntar í samfélaginu og fjölga félögum með fræðslu og jákvæðri kynningu á Siðmennt sem fallegur og virðulegur valkostur þegar kemur að stóru viðburðunum í lífinu. Einnig vill ég efla enn frekar samtarf við erlend systurfélög Siðmenntar ekki síst á Norðulöndum og í Bretlandi. 

Ég hef persónulega mikinn áhuga á tungumálum, sagnfræði og mannfræði ásamt tölvu- og upplýsingatækni. Ég tel að reynsla mín af félagsstörfum, starfinu og lífinu öllu geti komið félaginu til góða og óska því eftir stuðningi ykkar í  á aðalfundinum þann 17. næstkomandi.