Nú eru skráningar í borgaralegar fermingarathafnir fyrir árið 2024 komnar vel af stað og mörg að velta því fyrir sér hvenær hægt verði að skrá í fermingarfræðsluna.
Skráning hefst vikuna 11. - 15. september næstkomandi og fer fram í gegnum Sportabler. Fyrst verður opnað fyrir þau sem hafa greitt staðfestingargjaldið og síðan verður opnað fyrir almenna skráningu. Hægt verður að fylgjast með þeim valmöguleikum sem verða í boði hér á heimasíðunni þegar nær dregur.
Öll fræðsla hefst svo eftir áramót.
Í ár buðum við upp á fjölbreytta fræðslumöguleika og munum við gera það aftur á næsta ári þar sem þátttakendum býðst að velja námskeið í formi eins af neðangreindum tegundum:
- Hefðbundin fermingarfræðsla þar sem kennt er 1,5 klst í viku í 11 vikur samtals.
- Löng helgi á Úlfljótsvatni.
- Fermingarnámskeið þar sem lögð er áhersla á listsköpun.
- Fermingarnámskeið þar sem lögð er áhersla á útiveru.
Öll námskeið fylgja sömu námsskrá en hana má kynna sér hér.
Líkt og fyrri ár er góður afsláttur af fræðslunni fyrir foreldra sem skráðir eru í Siðmennt en það er þó alls engin skylda að vera skráð. Afsláttur er 10.000 kr á hvort foreldri/stjúpforeldri eða hámark 20.000 kr. Skráning er fólki að kostnaðarlausu og fer fram í gegnum Þjóðskrá á www.skra.is á "Mínar síður" og þar undir trú-og lífskoðunarfélög og Siðmennt valin þar af listanum.
Fyrirspurnum um fræðsluna eða athafnir í borgaralegri fermingu má beina á ferming@sidmennt.is