Hvað er veraldleg athöfn?

Veraldlegar athafnir eru miðaðar að þörfum fólks með veraldlegar/húmanískar lífsskoðanir, en eru opnar öllum óháð lífsskoðun, t.d. trúuðu fólki sem af einhverjum ástæðum óskar ekki eftir trúarlegri athöfn. Í athöfnum Siðmenntar er lögð áhersla á hið sammannlega.

Veraldlega athöfn er í boði fyrir alla en þó með þeim fyrirvara að athafnarstjóri Siðmenntar flytur ekki trúarlegt efni eða blessanir. Þá getur yfirbragð athafnarinnar ekki heldur verið trúarlegt, þ.e. trúarlegir sálmar eða ljóð verða ekki hluti af athöfninni. Á þessu geta þó verið einhverjar takmarkaðar undantekningar undir sérstökum kringumstæðum (t.d. ef einhver trúaður ættingi óskar eftir að fara með eitthvað trúarlegt efni). Fólki sem vill byggja athafnir sínar á trú er því góðfúslega bent á að leita til trúfélags.

Senda má fyrirspurnir um þjónustu athafnarstjóra á athafnir@sidmennt.is til framkvæmdastjóra félagsins, Bjarna Jónssonar, sem sér um umsýslu athafnanna (frá 1.9.2015).

Fagumsjónarmaður (gæði, kennsla) athafnaþjónustu Siðmenntar er Svanur Sigurbjörnsson. Allt athafnarstarf félagsins er í umboði formanns þess, Jóhanns Björnssonar.

  Framkvæmd og undirbúningur

Þær snúast um þann kjarna sem hverri tegund athafnar fylgir. Í nafngjöf er það tilkynning og opinberun nafns barnsins í faðmi fjölskyldu og vina. Í giftingu eru það heityrðin og lögfestingin og í útför er það heiðrun minningu hins látna og sameiginleg kveðjustund syrgjenda. Lögð er áhersla á hina sammannlegu upplifun einlægra tilfinninga og virðuleiki og hlýleiki höfð í fyrirrúmi. Mikið rými er fyrir persónulegar útgáfur og breytileika eftir óskum hvers og eins og aðstoðar athafnarstjórinn við útfærslur á hugmyndum.

Það má auðvitað bæta við tónlistaratriðum / upplestri á milli annarra liða og breyta til á ýmsa vegu. Sumt getur vel gengið, annað síður og ráðleggur athafnarstjórinn í því sambandi.

Hugvekjur athafnarstjóra eru stuttar heimspekilegar ræður um þau mál sem eru viðeigandi hverju sinni, t.d. um þroska barna við nafngjafir, ástina, vináttuna og virðinguna við giftingar og ýmislegt um lífsleiðina við útfarir. Saga pars í giftingum er stutt tala um það hvernig hjónaefnin hittust og annað skemmtilegt eða þeim mikils virði í sögu þeirra fram að giftingunni.

Athafnarstjórar frá Siðmennt klæðast látlausum spariklæðnaði og þeim fylgja ekki neinir munir eða spjöld til auglýsingar.

Aðilar að nafngjöf eða giftingu fá undirritað vandað staðfestingarvottorð frá athafnarstjóranum að athöfn lokinni. Það er innifalið í verði þjónustunnar.

Í undirbúningi þessara athafna hittir athafnarstjórinn umbeiðendur í viðtali og svo við æfingu (gifting) fyrir athöfnina. Þetta er innifalið í verðinu, en ef að aka þarf langar vegalengdir (yfir 30 km í heild) þarf að greiða aukalega fyrir það samkvæmt sanngjörnum taxta (per km). Einnig getur komið til þess að greiða þurfi hóflegt tímagjald fyrir ferðir sem taka lengur en 1 klst. og ef dvöl á staðnum er lengri en 1 klst.

  Fjöldi athafna

Athöfnum Siðmenntar fjölgar á hverju ári. Eftir að Siðmennt fékk skráningu sem lögformlegt lífsskoðunarfélag 3. maí 2013 hefur fjöldi athafna margfaldast.

Hér er mynd sem sýnir þessa þróun:

  Staðsetningar athafna á landinu

Í lok ágúst 2014 höfðu athafnir (utan borgaralegrar fermingar) farið fram á eftirfarandi stöðum:

Hús / salir

Staðir athafna (útfarir, nafngjafir og giftingar)

Þetta er ekki tæmandi listi en gefur mynd af því flestu.  Samtals hafa farið fram 265 athafnir þegar þetta er ritað (29.8.2014).