Borgaraleg ferming

Markmið borgaralegrar fermingar er að styrkja sjálfsmynd, metnað og uppbyggilegt hugarfar. Fermingarfræðsla miðar að því að efla heilbrigð og farsæl viðhorf unglinga til lífsins og búa þeim dýrmætt veganesti til framtíðar.

Skráning og skráningarfrestur

Skráning hefst 1. ágúst 2020 

Skráningarfrestur ER til 15. nóvember 2020 nema á Akureyri til 15. janúar 2021.

Þó verður enn hægt að skrá sig eftir það ef það eru ennþá laus pláss á námskeiðunum. Verður þá lagt á sérstakt seinskráningargjald, þar sem skipulagsvinna hefur þegar átt sér stað. Greiða þarf þátttökugjaldið fyrir byrjun kennslunnar.

Staðfestar dagsetningar fyrir borgaralegar fermingarathafnir 2021 má sjá hér á þessari síðu

Gjaldskrá 2021

Námskeið: 30.000
Athafnargjald: 15.000
Samtals: 45.000
Veittur er 25% systkinaafsláttur. Sömuleiðis er veittur 10.000 króna afsláttur ef foreldri/forráðamaður er í Siðmennt, per foreldri/forráðamann (að hámarki 20.000 per barn).

Einnig er hægt að fá svokallaða heimafermingu kostar sú athöfn 15.000 krónur aukalega – og mögulegt akstursgjald ef athöfnin er utan heimasvæðis athafnarstjóra.

Undirbúningsnámskeið

Ungmenni sem fermast borgaralega sækja undirbúningsnámskeið þar sem fjallað er um ýmislegt sem miðar að því að efla þroska, gott siðferði og ábyrgðarkennd. Má nefna sem dæmi gagnrýna hugsun, siðfræði, fjölmiðlalæsi, að vera unglingur í auglýsinga- og neyslusamfélagi, mannleg samskipti, fjölmenningu og fordóma, skaðsemi vímuefna, sjálfsmyndina og samskipti kynjanna, hamingjuna og tilgang lífsins, tilfinningar og sorg, mannréttindi og að bera virðingu fyrir umhverfi sínu.

Námskeiðið fjallar um siðferði og virðingu, ábyrgð, samskipti, mannréttindi og margt fleira.

Athöfnin

Að loknu námskeiði eru ungmennin fermd við hátíð­lega athöfn. Hluti fermingarbarnanna tekur virkan þátt í athöfninni, t.d. með ljóðalestri, dansi, tónlistarflutningi og ávörpum og öll fá viðurkenningarskjal sem staðfestir ástundun þeirra í náminu. Á höfuðborgarsvæðinu fara athafnir alla jafna fram á sunnudögum í apríl og utan þess eru fermingarathafnir haldnar eftir þátttöku á hverjum stað hverju sinni. Siðmennt leggur metnað í að gera athafnir sínar hátíðlegar og virðulegar, en jafnframt skemmtilegar og eftirminnilegar.

Orðið ferming er dregið af latneska orðinu confirmare, sem merkir m.a. að styrkjast eða staðfesta. Ungmennin eru að styrkja þá ákvörðun sína að vera ábyrgir borgarar í lýðræðislegu samfélagi.

Ferming fyrir öll ungmenni

Við eigum það öll sameiginlegt að vera manneskjur og fögnum fjölbreytileika mannlífsins. Fermingin er opin öllum ungmennum, óháð uppruna, kyni, kynhneigð eða trúarbrögðum.

Námskeið um allt land

Fermingarbörnin sækja námskeið á höfuðborgarsvæðinu í 11 vikur, einu sinni í viku í um 80 mínútur í senn. Kennsla hefst snemma í janúar. Þátttakendur utan höfuðborgarsvæðisins sækja tvö helgarnámskeið , sem verða í boði í Reykjavík, Akureyri, Reykjanesbæ, Akranes, Selfossi og mögulega víðar. Ef næg þátttaka er fyrir hendi í heimabyggð er möguleiki á að halda helgarnámskeið á staðnum. Æskilegt er að áhugi um það komi fram við skráningu. Ungmenni búsett erlendis geta tekið fermingarnámskeið í fjarnámi.


Mikilvægt:

Mikilvægt  er að muna að eindagi þátttökugjaldsins er í byrjun janúar, þannig að foreldrar verða að greiða eða ganga frá greiðslutilhögun áður en námskeiðið byrjar. Hægt er að skipta greiðslu í allt að 3 hluta í heimabanka. Einnig er hægt að dreifa greiðslu með greiðslukorti.

Hætt við þátttöku í námsskeiði

Hætti barn við þátttöku er þátttökugjaldið endurgreitt að stærstu hlutaf ef látið er vita tímanlega. Athafnagjaldið er þá að fullu greitt til baka en Siðmennt heldur eftir 10.000 kr af námskeiðisgjaldi vegna skipulagsvinnu:

  • Vegna hefðbundinna námskeiða þarf að láta vita í síðasta lagi sunnudag fyrir byrjun 2. viku námskeiðsins.
  • Vegna helgarnámskeiða í síðasta lagi í lok fyrsta dags.

Mikilvægt:

Hætti fermingarbarn við að taka þátt í athöfn (óháð þátttöku í námskeiði) fyrir 20. mars, er athafnargjald að fullu endurgreitt. Eftir það fæst athafnargjaldið ekki endurgreitt sökum þess að skipulags- og prentunarvinna við fermingardagskrár eru á lokastigi.

Seinskráningargjald

Skráningarfrestur í BF er til og með 1. nóvember. Þó verður enn hægt að skrá sig eftir það og fram í byrjun desember ef það eru ennþá laus pláss á námskeiðunum. Verður þá lagt á sérstakt seinskráningargjald að upphæð 5.000 kr, þar sem skipulagsvinna hefur þegar átt sér stað.