Borgaraleg ferming
Fermingardagurinn á að vera svo miklu meira en bara kransakakan. Þetta er útskriftarhátíð ungs fólks sem hefur vikurnar á undan velt fyrir sér stórum spurningunum sem við öll höfum um lífið. Borgaraleg ferming byggir á húmanískum grunni, þar sem gagnrýnin hugsun, siðfræði og samfélagslegar forsendur liggja til grundvallar.
Fermingarfræðsla Siðmenntar miðar að því að efla unglinga og búa þeim dýrmætt veganesti til framtíðar.
Á námskeiðinu er lagt upp með því styrkja sjálfsmynd, hvetja til víðsýni og styðja við uppbyggilegt hugarfar.
Fermingin er opin öllum ungmennum – óháð uppruna, kyni, kynhneigð, trú eða lífsskoðunum. Hvorki ungmennin né foreldrar þeirra þurfa að vera skráð í Siðmennt til að fermast hjá okkur. Aldursviðmið er 13-15 ára.
Að fermast borgaralega
Húmanísk fermingarfræðsla
Fermingarfræðslan samanstendur af viðfangsefnum húmanískrar stefnu sem eiga vel við þann þroska sem einstaklingar taka út á unglingsárunum. Námskráin er þannig uppbyggð að hún fangar viðfangsefni námskeiðsins á heildrænan máta og leiðir þátttakendur í gegnum þær stóru spurningar sem kunna að vakna á leiðinni.
Nánari upplýsingar um húmaníska fermingarfræðslu.
Veraldleg athöfn
Að loknu námskeiði eru ungmennin fermd við hátíðlega athöfn þar sem þau fá viðurkenningarskjal sem staðfestir ástundun þeirra í náminu. Hluti fermingarbarnanna tekur virkan þátt í athöfninni, t.d. með ljóðalestri, dansi, tónlistarflutningi og ávörpum. Siðmennt leggur metnað í að gera athafnir sínar hátíðlegar og virðulegar, en jafnframt skemmtilegar og eftirminnilegar. Nánari upplýsingar um borgaralegar fermingarathafnir.
Kostnaður
Verðskrá 2024:
* Verðskrá er birt með fyrirvara um breytingar og villur.
** Seinskráningargjald innheimt eftir að skráningu lýkur 15. janúar.
Gjald tengt staðsetningu athafna fyrir heimafermingar:
Akstursgjald: 184 kr/km fyrir árið 2023
Bið- & göngugjald: 10.000 kr/klst
* Akstursgjald fylgir ákvörðun fjármálaráðuneytisins og er breytilegt milli ára. Akstursgjaldið er rukkað skv. verðskrá hverju sinni á þeim tíma athöfnin fer fram.
* Fyrir athafnir utan heimasvæðis athafnarstjóra eru innheimtar 184 kr/km í aksturskostnað. Félagar í Siðmennt greiða þó ekki aksturskostnað vegna athafnar í sinni heimabyggð, nema í þeim tilfellum þar sem sérstaklega er óskað eftir athafnastjóra sem ekki býr á svæðinu.
* Dæmi: Frá Reykjavík til Þingvalla eru 95 km fram og til baka. Heildar akstursgjald væri þá 17.480 (95*184). Allir útreikningar eru byggðir á Google maps vegalengdum.
* Með bið er átt við veruleg frávik frá dagskrá, svo sem seinkun sem varðar hálftíma eða meira.
* Dæmi: Ef athafnastjóri þarf að bíða eða ganga í hálftíma bætist 5.000 kr. gjald við.
* Vinsamlegast athugið að í ákveðnum tilvikum gæti athafnastjóri þurft að gista nótt á hóteli. Sá kostnaður bætist við ferðakostnað og kostnað við athöfnina. Nánari upplýsingar veita starfsmenn Siðmenntar.
Afsláttur fyrir félaga í Siðmennt
Aðild að Siðmennt er ekki skilyrði fyrir þátttöku í Borgaralegri fermingu. Meðlimir í Siðmennt fá að venju góðan afslátt, og reiknast sá afsláttur af verðinu þegar börn eru skráð á námskeið.
Eftir að barn er skráð í námskeið þarf að senda staðfestingu á að foreldri/stjúpforeldri sé skráð í félagið á ferming@sidmennt.is Við munum þá handvirkt lækka greiðsluseðilinn eða endurgreiða inná kort eftir því hvaða greiðsluleið er valinn í ferlinu í Sportabler við skráningu.
Ef systkini fermast á sama tíma, er veittur 20% afsláttur.
Fermingarfræðsla fyrir forvitin fermingarbörn
Í fermingarfræðslunni takast fermingarbörnin á við ýmis álitamál og beita gagnrýninni hugsun til þess að velta upp ólíkum sjónarmiðum. Fermingarfræðslan er lifandi og fer fram í gegnum leiki og æfingar sem virkja fermingarbörnin.