Lög Siðmenntar

Lög Siðmenntar – að grunni til samþykkt á stofnfundi 15. febrúar 1990, síðast breytt á aðalfundi 24. mars 2010, en helstu breytingar eru frá 26. febrúar 2008.

1. Nafn félagsins er Siðmennt – félag siðrænna húmanista á Íslandi. Heimili þess og varnarþing er í Reykjavík.
2. Félagið er málsvari húmanisma (manngildisstefnu) og frjálsrar hugsunar, óháð trúarsetningum. Það fjallar um siðferði og þekkingarleit mannsins. Það stendur fyrir borgaralegum, veraldlegum og húmanískum athöfnum. Stefnu og markmiðum félagsins skal frekar lýst í “Stefnu Siðmenntar”.
3. Aðalfundur hefur æðsta vald í málum félagsins. Hann skal halda á fyrsta fjórðungi árs hvers og skal boðað til hans skriflega með tveggja vikna fyrirvara og er þá miðað við dagsetningu póststimpils á fundarboði. Rétt til atkvæðagreiðslu á aðalfundi hafa þeir einir sem greitt hafa félagsgjald undangengins starfsárs.
4. Á aðalfundi skal kjósa fimm manna stjórn og tvo skoðunarmenn reikninga. Einnig skal á aðalfundi kjósa fimm varamenn en heimilt er að kjósa allt að sjö*. Þar skal einnig ákveða árgjald félagsins og afgreiða reikninga þess.
5. Breytingar á lögum og stefnu Siðmenntar má aðeins samþykkja á aðalfundi. Skulu tillögur þess efnis hafa borist stjórn félagsins fyrir janúarlok ár hvert og sendir stjórnin þær til félagsmanna ásamt aðalfundarboði.
6. Stjórn félagsins skiptir með sér verkum. Hún fer með æðsta vald í málum félagsins milli félagsfunda. Stjórn hefur umboð til að skipa í nefndir og umsjónarstörf með verkefnum félagsins hverju sinni.
7. Félagsfundir eru haldnir eftir þörfum og í fundarboði skal geta dagskrár.
8. Krefjist þriðjungur félagsmanna þess skriflega skal boðað til félagsfundar. Skal það gert bréflega með tveggja vikna fyrirvara miðað við póststimpil og stjórn félagsins skal boða fundinn eigi síðar en viku eftir að beiðnin hefur borist henni.

[Samþykkt á aðalfundi 26. febrúar 2008]

[*viðbót um "allt að sjö" samþykkt á aðalfundi 24. mars 2010]