Lög Siðmenntar

Lög Siðmenntar – að grunni til samþykkt á stofnfundi 15. febrúar 1990, síðast breytt á aðalfundi 28. febrúar 2013.

1. Nafn félagsins er Siðmennt – félag siðrænna húmanista á Íslandi. Heimili þess og varnarþing er í Reykjavík.

2. Siðmennt er málsvari húmanisma (manngildisstefnu), frjálsrar hugsunar og er óháð trúarsetningum. Siðmennt fjallar um siðferði og þekkingarleit mannsins. Siðmennt stendur fyrir borgaralegum, veraldlegum og húmanískum athöfnum. Stefnu og markmiðum félagsins skal frekar lýst í stefnu Siðmenntar.

3. Þeir sem styðja stefnu félagsins sbr. 2. grein geta gerst félagar. Hægt að gerast félagi með því að skrá sig hjá Þjóðskrá. Þeir sem vilja gerast félagar án þess að skrá sig hjá Þjóðskrá Íslands geta gert það með því að senda félaginu bréf með ósk um skráningu og greiða félagsgjald. Þá er einnig hægt að vera skráður á báðum stöðum og styrkja þannig félagið aukalega.

4. Aðalfundur hefur æðsta vald í málum félagsins. Hann skal halda á fyrsta fjórðungi árs hvers og skal boðað til hans skriflega með tveggja vikna fyrirvara og skal fundarboð sent með netpósti (rafrænn sendingartími netþjóns) eða bréfleiðis (dagsetning póststimpils) þegar félagi hefur ekki netfang. Senda skal eina ítrekun með minnst 48 klst. fyrirvara með netpósti (eingöngu). Rétt til atkvæðagreiðslu á aðalfundi hafa þeir sem skráðir eru í félagið hjá Þjóðskrá og/eða þeir sem eru skráðir beint og hafa greitt félagsgjald undangengins starfsárs. Meirihluti stjórnar getur boðað til aukaaðalfundar. Einnig getur þriðjungur félagsmanna óskað eftir aukaaðalfundi og skal þá tilgetið í þeirri ósk hvert fundarefni skal vera.

5. Á aðalfundi skulu eftirfarandi mál tekin fyrir:

• Ársskýrsla stjórnar
• Reikningar félagsins
• Ákvörðun félagsgjalda
• Lagabreytingar
• Kosning fimm manns í aðalstjórn og allt að sjö í varastjórn
• Velja tvo skoðunarmenn reikninga

6. Breytingar á lögum og stefnu Siðmenntar má aðeins samþykkja á aðalfundi. Skulu tillögur þess efnis hafa borist stjórn félagsins fyrir janúarlok ár hvert og sendir stjórnin þær til félagsmanna ásamt aðalfundarboði.

7. Stjórn félagsins skiptir með sér verkum. Hún fer með æðsta vald í málum félagsins milli félagsfunda. Stjórn hefur umboð til að skipa í nefndir og umsjónarstörf með verkefnum félagsins hverju sinni.

8. Félagsfundir eru haldnir eftir þörfum og í fundarboði skal geta dagskrár.

9. Krefjist þriðjungur félagsmanna þess skriflega skal boðað til félagsfundar. Skal það gert bréflega eða með netpósti með tveggja vikna fyrirvara miðað við póststimpil og stjórn félagsins skal boða fundinn eigi síðar en viku eftir að beiðnin hefur borist henni.

Bráðabirgðaákvæði: Þar sem umsókn Siðmenntar um skráningu sem lífsskoðunarfélag hefur ekki verið afgreidd af Innanríkisráðuneytinu og ekki vitað hvernig skráningu félagsmanna verður háttað hjá Þjóðskrá verður að gera ráð fyrir því að aðlaga þurfi lög félagsins að breyttri stöðu. Því er þetta bráðabirgðaákvæði sett þar sem heimild er gefin fyrir því að boða til aukaaðlafundar ef meirihluti stjórnar Siðmenntar telur það nauðsynlegt. Ákvæði þetta fellur niður fyrir aðalfund 2014.

[Samþykkt á aðalfundi 26. febrúar 2008]

[Viðbót um "allt að sjö" samþykkt á aðalfundi 24. mars 2010]

[ Breyting á boðun aðalfundar samþykkt á aðalfundi 1. mars 2012]

[Breytingar á 3. gr. um félagsaðild og 4.gr um boðun aðalfundar samþykktar á aðalfundi 28. febrúar 2013]