Siðmennt – félag siðrænna húmanista á Íslandi var stofnað árið 1990 í kringum borgaralega fermingu.

Félagið þróaðist síðan fljótt í að vera fullgilt húmanískt félag með aðild að alþjóðasamtökum húmanista (IHEU).

Félagið er lífsskoðunarfélag og hefur að viðfangsefni þau viðhorf og lífsgildi sem eru persónulega mikilvæg og náin hverjum einstaklingi í leit að tilgangi og hamingju í lífinu.

Hugtakið lífsskoðunarfélag (life stance organization) nær á alþjóðavísu yfir félög af bæði trúarlegri og veraldlegri sannfæringu og gerir ekki upp á milli þeirra.

Siðferðismál, þekkingarfræði og fjölskyldan eru kjarni þeirra viðfangsefna sem Siðmennt sinnir.

  • Mannvirðing, frelsi og samábyrgð eru siðferðilegir hornsteinar manngildishyggjunnar / húmanismans.
  • Siðmennt styður við vísindalegar aðferðir til að leita þekkingar um veröldina og lífheiminn.
  • Félagið býður upp á þjónustu athafnarstjóra félagsins við nafngjafir, giftingar og útfarir, auk vandaðs námskeiðs fyrir ungmenni til undirbúnings fyrir borgaralega fermingu.

Aðild að Siðmennt er öllum opin sem telja sig eiga samleið með þeim lífsskoðunum og þeirri sannfæringu sem birt er í stefnu félagsins.

Skilyrði fyrir aðild eru að félagar þurfa að vera orðnir 16 ára og greiða árgjald.  Félagar fá send fréttabréf með netpósti, boð á aðalfund hvers árs og afslátt af ýmissi þjónustu félagsins.

Félagsmenn eru töluvert á þriðja hundrað. Félagið vantar fleiri félagsmenn til að vinna að markmiðum þess og greiða árgjald sem er 4400 krónur. Námsmenn, öryrkjar og aldraðir fá nú helmingsafslátt af félagsgjaldi óski þeir eftir því og greiða þá 2200 krónur.  Makar félagsmanna eiga kost á 25% afslætti og greiða 3300 krónur. Félagið byggir starf sitt á félagsgjöldum og sjálfboðavinnu félagsmanna og nýtur ekki opinberra styrkja.

Síðast uppfært 29. ágúst 2011

Login