Almennt um nafngjöf

Veraldleg eða húmanísk nafngjöf

Siðmennt býður uppá uppá þjónustu athafnarstjóra við fallegar veraldlegar eða húmanískar nafngjafarathafnir til þess að gefa barni formlega nafn og fagna þeirri merku ákvörðun í lífi þess og fjölskyldunnar. Það hefur lengi tíðkast að gefa börnum nafn utan trúfélaga og án þess að prestur skíri og skrái barnið í söfnuð sinn. Ýmist er haldin persónuleg athöfn heima fyrir með athafnarstjóra eður ei eða nafngjöfin einfaldlega tilkynnt fjölskyldu og vinum án athafnar. Eina formsatrið sem þarf að uppfylla er að fylla út eyðublað hjá Þjóðskrá til löglegrar skráningar á nafni barnsins fyrir sex mánaða aldurs þess.

Athafnaþjónusta Siðmenntar

Siðmennt lagði úr vör með veraldlega athafnaþjónustu 29. maí 2008. Félagið hefur menntað og þjálfað athafnarstjóra sem ráðleggja foreldrum og stýra veraldlegum eða húmanískum nafngjöfum. Fyrsta nafngjafarathöfnin á vegum félagsins fór fram 28. maí 2008, en athafnarstjóri þeirrar athafnar var Bjarni Jónsson.

Þá má senda fyrirspurnir á athafnir@sidmennt.is til umsjónarmanns athafnarþjónustu Siðmenntar, Svans Sigurbjörnssonar.

Auk athafnarstjórnunar býður Siðmennt uppá ráðgjöf og leiðbeiningar fyrir foreldra sem vilja halda eigin borgaralega eða veraldlega athöfn án hjálpar athafnarstjóra.  Leiðbeiningaskjalið heitir: Vinnublað borgaralegs stjórnanda nafngjafar (21. maí 2009). Beiðni um skjalið skal senda til Svans Sigurbjörnssonar á athafnir@sidmennt.is

Fyrir hverja?

Athafnir Siðmenntar innihalda ekki hugmyndafræðilegar játningar af neinu tagi. Þær eru miðaðar að þörfum fólks með veraldlegar/húmanískar lífsskoðanir, en eru opnar öllum óháð lífsskoðun, t.d. trúuðu fólki sem af einhverjum ástæðum óskar ekki eftir trúarlegri athöfn. Nauðsynlegt er að gera sér grein fyrir því að athafnarstjórinn fer ekki með trúarlegt innihald í athöfninni og tónlistarflutningur miðast einnig að því. Fólki sem vill byggja athafnir sínar á trú því góðfúslega bent á að leita til trúfélags. Veraldleg nafngjöf felur ekki í sér inngöngu í Siðmennt enda skráir félagið ekki fólk í félagið fyrr en við 16 ára aldur eða eldri. Nafngjafarathöfn á vegum félagsins snýst því ekki um að velja einhverja ákveðna lífsskoðun (trúarlega eða veraldlega) fyrir barnið, heldur eingöngu að stuðla að fallegri ahöfn og fara með veraldlega / húmaníska hugvekju í tilefninu.

Kostnaður

Siðmennt setur upp ákveðið gjald fyrir hverja athöfn og í því felst kaup athafnarstjórans og umsýsla. Gjald fyrir nafngjafarathöfn á höfuðborgarsvæðinu er kr. 12.500.  (frá 1.9.2012)

Frá 9. apríl 2013 gilda eftirfaradi afslættir fyrir félaga í Siðmennt:

1. Nýir félagar á fyrsta ári aðildar fá 10% afslátt af nafngjöfum og giftingum.
2. Félagar á öðru ári aðildar eða meira fá 50% afslátt af nafngjöfum og giftingum.
3. Bæði nýir félagar og eldri fá fría þjónustu athafnarstjóra félagsins við útför sína.

Greiða skal gjaldið með millifærslu á reikning Siðmenntar (0549-26-6002, kt. 600290-1429), einni viku fyrir athöfnina.   Sé beðið um athöfn með minni fyrirvara þarf að greiða gjaldið sama dag og beiðni er send til félagsins um athafnarstjórnun.

Æskilegt er að beiðnir um athafnarstjórnun á vegum félagsins berist a.m.k. 2 vikum fyrir áætlaðan dag nafngjafar. Eftir því sem við á skal greiða ferðakostnað og gistingu/dagpeninga, fyrir athafnarstjóra. Fólki utan félagsins sem fær athöfn hjá því býðst að gerast félagar endurgjaldslaust fyrsta árið.  Nánari upplýsingar eru veittar af umsjónarmanni athafnaþjónustunnar og má senda honum netpóst á athafnir@sidmennt.is.