Almennt um giftingu

Hátíðleg veraldleg/húmanísk gifting Siðmenntar

Mörg pör hafa látið nægja að gifta sig borgaralega hjá sýslumanni, sérstaklega ef sýslumaður viðkomandi umdæmis var fáanlegur á fallegan stað eða heimili út fyrir skrifstofu sína, en með athafnaþjónustu Siðmenntar gefst nú tækifæri til að halda hátíðlegri veraldlega/húmaníska giftingarathöfn með öllum þeim viðbótum (tónlist, söng, ljóðalestri, hugvekju, orð til parsins, sérstök heit, o.s.frv.) sem gera slíka giftingu mun persónulegri og innihaldsríkari, en hægt er að fá með lagalegri athöfn í umsjón sýslumanns.

Hvað er veraldleg eða húmanísk gifting?

Veraldleg / húmanísk gifting fer fram til að fagna því að par (óháð kynhneigð) vill opinbera heit sín til hvors annars á formlegan og hátíðlegan máta fyrir framan fjölskyldu sína og vini. Þetta á einnig við um trúarlegar giftingar en munurinn er sá að í veraldlegri athöfn fer ekki fram trúarleg vígsla og hjónin eru ekki gefin saman, heldur leidd saman til hjúskaparheita af athafnarstjóra í stað prests. Það er því hvorki um vígslu (helgun) að ræða, né að parið sé gefið hvört öðru saman af æðri mætti eða fulltrúa þess. Í veraldlegri giftingu er gerandinn parið sjálft en athafnarstjórinn leiðbeinir í athöfninni og flytur hugleiðingu tengda lífi þeirra og hjónabandinu. Athöfnin ber ekki trúarlegt innihald. Tónlist, söngur og ljóð eða önnur listræn tjáning eru ríkur þáttur af athöfninni sem ber jafnan ákaflega gleðilegt yfirbragð. Ættingjar og vinir og jafnvel brúðhjónin sjálf geta lagt sitt af mörkum til að gera athöfnina eftirminnilega.

Fyrir hverja er veraldleg gifting?

Veraldleg gifting er fyrir öll þau pör sem aðhyllast veraldlegar eða húmanískar lífsskoðanir eða vilja ekki af einhverjum ástæðum hafa trúarlega athöfn. Siðmennt neitar engum um þessa þjónustu, hvort sem að fólk er trúað eða ekki, en parið þarf að uppfylla lagaleg skilyrði giftingar og gera sér grein fyrir því að athafnarstjórinn mun ekki flytja trúarlegt efni eða blessanir. Þá getur yfirbragð athafnarinnar ekki heldur verið trúarlegt, þ.e. trúarlegir sálmar eða ljóð verða ekki hluti af athöfninni. Á þessu geta verið einhverjar takmarkaðar undantekningar undir sérstökum kringumstæðum (t.d. ef trúaðir og húmanistar giftast). Athöfnin er því aðskilin frá trú og því ólíklegt að hún henti eða nægi trúuðu fólki.

Siðmennt gerir ekki upp á milli ástarsambanda og leiðir pör saman til giftingar óháð kynhneigð. Þannig verða samkynhneigð pör að hjónum með sömu stöðu og þau gagnkynhneigðu í augum húmanista. Ástin ræður. Því miður hefur löggjafinn í landinu ekki fullnað jafnrétti gagnvart samkynhneigðum því gifting þeirra er kölluð “staðfest samvist” og er meðhöndluð í sérstökum lagabálki í stað þess að vera undir venjubundinni hjúskaparlöggjöf. Það er þó ánægjuefni að á vorþingi 2008 skyldi Alþingi samþykkja frelsi trúfélaga til að gefa saman samkynhneigð pör.

Húmanísk gifting er að öllu leyti hin sama og veraldleg utan þess að hún felur í sér giftingu pars þar sem bæði eru húmanistar að lífsskoðun og óska e.t.v. eftir ríkari áherslu á umfjöllun um húmanisma eða húmanísk gildi við athöfnina.

Hvar fara veraldlegar eða húmanískar giftingar fram?

Í sjálfu sér er ekkert útilokað fyrirfram hér, en þar sem ekki er um trúarlegar athafnir að ræða eru veraldleg salarkynni mun æskilegri en kirkjur. Þá er um að gera að nota ímyndunaraflið og sköpunargáfuna til að finna skemmtilega staði og þar getur náttúrufegurð landsins komið að góðum notum. Skreyta má samkomusali eða búa til rómantíska boga eða hlið með eða án palls úti við. Möguleikarnir eru ótal margir.

Ástarheit og endurnýjun

Siðmennt mun einnig bjóða uppá þjónustu við heityrðaathafnir þar sem par sem vill fara með sín heityrði án þess að giftast lögformlega eða endurnýja heit sín t.d. á 25 ára brúðkaupsafmæli sínu, getur átt sinn dag.

Saga veraldlegrar eða húmanískrar giftingar á vegum Siðmenntar

Í september 2007 urðu þáttaskil í starfi Siðmenntar. Þá fór fram í fyrsta sinn veraldleg gifting á vegum félagsins. Jóhann Björnsson var athafnarstjóri athafnarinnar fyrir hönd Siðmenntar og leiddi parið til hjúskaparheita. Frá og með 29. maí 2008 hófst formlega athafnaþjónusta Siðmenntar sem hefur í boði þjónustu athafnarstjóra fyrir veraldlegar eða húmanískar giftingar.

Kostnaður

Siðmennt setur upp ákveðið gjald fyrir hverja athöfn og í því felst kaup athafnarstjórans og umsýsla. Gjald fyrir giftingarathöfn á höfuðborgarsvæðinu er kr. 16.500 (beiðnir frá 20.09.2010). Æskilegt er að beiðnir um athafnarstjórn á vegum félagsins berist a.m.k. 1 mánuði fyrir áætlaðan brúðkaupsdag. Eftir því sem við á skal greiða ferðakostnað og gistingu/dagpeninga, fyrir athafnarstjóra. Félagsmenn í Siðmennt fá afslátt af þjónustunni, 15% fyrstu tvö ár aðildar og svo 50% frá og með 3. aðildarári. Nánari upplýsingar eru veittar af umsjónarmanni athafnaþjónustunnar.