Kostnaður

Allir þátttakendur, vinsamlegast lesið neðangreint nákvæmlega

ATH: Enn á eftir að ákveða gjald fyrir borgaralega fermingu 2013. Gjaldið verður þó svipað því sem það var 2012. Endanleg ákvörðun um gjald verður tekin í júní 2012. 

Námsgjald fyrir ferminguna árið 2012 er kr. 26 þúsund kr. á hvert ungmenni. Til viðbótar kostar fermingarathöfnin kr. 8.000 (athafnargjald), eða samanlagt 34.000, rukkað í einu þátttökugjaldi. Þeir sem verða ekki í athöfn borga ekki athafnargjaldið.

ATHUGIÐ að sú breyting verður á tilhögun þátttökugjalda nú fyrir ferminguna 2012 að bæði námskeiðsgjaldið og athafnargjaldið verður rukkað saman í einu gjaldi í byrjun desember 2011.  Þetta er gert til einfalda, hagræða og minnka kostnað við innheimtu þátttökugjaldsins auk þess sem þetta hjálpar við að halda heildarverðinu niðri.

Gjalddagi fyrir greiðslu þátttökugjalds er 3. desember 2011 og eindagi 5. janúar 2012.

Afsláttur af þátttökugjaldi

• Félagar í Siðmennt fá 10% afslátt af gjaldinu fyrir börn sín fyrstu tvö ár aðildar og 20% afslátt frá og með þriðja ári aðildar. Félagar þurfa að láta vita af sér við skráningu.

• Ef systkini fermast á sama tíma, er veittur 20% afsláttur.

Mikilvægt:

Í ár er eindagi námskeiðsgjaldsins (sem byrjar í janúar) þann 5. janúar 2012, þ.e. foreldrar verða að greiða námskeiðsgjaldið áður en barnið byrjar.  Þetta fyrirkomulag var tekið upp árið 2010 vegna þess að það færðist mikið í aukana árin á undan að foreldrar greiddu ekki á tilsettum tíma að vori og sumir jafnvel alls ekki.  Þetta kostaði mikla vinnu og tíma við eftirfylgd og áminningar af hálfu gjaldkera, en slíkt er ekki hægt að búa við ár eftir ár.  Ekkert ungmenni fær því að hefja námskeiðið nema að foreldrar hafi greitt þátttökugjaldið eða samið um innborganir séu þeir í fjárhagsvanda.  Innborganir eru miðaðar við 3. des., 3. jan. og 3. febrúar og má ekki skilja meira eftir en þriðjung gjaldsins fyrir síðustu greiðsluna.

Hætt við þátttöku

Hætti ungmenni við þátttöku er námsskeiðsgjaldið að fullu greitt til baka ef látið er vita í síðasta lagi sunnudag fyrir byrjun 2. viku námskeiðsins.   Barnið fær því tækifæri til að hætta við líki því ekki við námskeiðið eftir fyrsta tímann án þess að valda foreldrum sínum kostnaði.

Mikilvægt:

Sé látið vita síðar (frá og með mánudegi 2. viku eða síðar) áskilur Siðmennt sér rétt til að halda eftir umsýslugjaldi upp á kr. 3000.   Þetta skapast af því að það kostar talsverða vinnu að endurskipuleggja hópana eftir að kennslan er komin af stað.

Gjald vegna athafnar – breytt fyrirkomulag 2012

Athafnargjald var áður rukkað í mars eða apríl, en nú verður það innifalið í einu þátttökugjaldi sem greitt er í desember áður en námskeiðin byrja.  Í þeim fáu undantekningatilvikum þar sem ungmenni tekur ekki þátt í athöfninni er hægt að fá endurgreiðslu á þeim hluta gjaldsins eftir að athöfninni lýkur.

Námsgjöldin eiga að standa undir launum umsjónarkennara, þóknun gestafyrirlesara, húsaleigu kennsluhúsnæðis og hluta af umsýslu- og kynningarstarfi.

Siðmennt nýtur ekki reglulegs stuðnings yfirvalda en hefur þó þrisvar fengið húsaleigustyrk frá Reykjavíkurborg (2006-2008) og fyrsta starfsárið fékk félagið örlítinn styrk frá menntamálaráðuneytinu. Tekist hefur að halda kostnaðinum lágum vegna talsverðar sjálfboðavinnu stjórnarmanna.  Síðastu ár (fermingarnar 2009, 2010 og 2011) bar svo við að Reykjavíkurborg veitti félaginu ekki húsaleigustyrk og jók það kostnaðinn fyrir foreldra.