Leik- og grunnskólar sem hið opinbera rekur eða styrkir eiga að vera griðarstaðir barna þar sem þau eru laus undan einhliða áróðri trú- eða lífsskoðunarfélaga. Hvorki börn né foreldrar eiga að þurfa að gefa upp lífsskoðun sína eða trúarafstöðu í opinberum skólum. Siðmennt áréttar að trú og lífsskoðun er fyrst og fremst einkamál.

Hér fyrir neðan má lesa leiðbeiningar Mennta- og menningarmálaráðuneytis og ýmissa sveitarfélaga um samskipti skóla og trú- og lífsskoðunarfélaga.

Einnig er hægt að senda Siðmennt tilkynningu um trúboð eða trúariðkun í opinberum skólum.

Í leiðbeiningum Mennta- og menningarmálaráðuneytis segir meðal annars:

„Eftir fremsta megni skal forðast að nemendur og foreldrar séu settir í þá aðstöðu að þurfa að gera grein fyrir lífsskoðunum sínum.“

Ennfremur segir:

„Mikilvægt er að fræðsla þessi og heimsóknir sé gerð á vegum skólans og í þeim tilgangi að fræða nemendur um tiltekin trúarbrögð, inntak þeirra, helgidóma og siði en feli ekki í sér innrætingu tiltekinna trúarskoðana eða tilbeiðslu.“

Í reglum Reykjavíkurborgar um samskipti skóla við trúar- og lífsskoðanafélög segir meðal annars:

„Hlutverk skóla borgarinnar er að fræða nemendur um ólík trúarbrögð og lífsskoðanir samkvæmt gildandi aðalnámskrá og námsefni. Eftir fremsta megni skal forðast að nemendur og foreldrar séu settir í þá aðstöðu að þurfa gera grein fyrir lífsskoðunum sínum.“

Ennfremur segir:

„Þess verði gætt við allar heimsóknir til og frá grunnskóla vegna fræðslu um trú og lífsskoðanir að nemendur fylgist með en séu ekki þátttakendur í helgisiðum og athöfnum, og að þær séu ekki vettvangur fyrir innrætingu eða dreifingu á boðandi efni.“

Viðmiðunarreglur ríkis og sveitarfélaga um samskipti trúfélaga og skóla:

• Viðmið Mennta- og menningarmálaráðuneytis um samskipti skóla og trúfélaga á öllum skólastigum
• Reglur um samskipti leikskóla, grunnskóla og frístundaheimila Reykjavíkurborgar við trúar- og lífsskoðunarfélög
• Reglur um samskipti skóla og trúfélaga í Árborg
• Viðmiðunarreglur um samskipti leik- og grunnskóla Hafnarfjarðar við trúar- og lífsskoðunarfélög
• Reglur um samskipti leik-, grunn- og tónlistarskóla í Grindavík við trúar- og lífsskoðunarfélög
• Samskiptareglur leik- og grunnskóla Kópavogs við aðila utan skólanna

Nánari upplýsingar af vefsíðu Siðmenntar:

• Opinberir skólar án trúarlegra merkimiða (sidmennt.is)

Greinar um skóla og trú:

•  Skólinn og jólin (Grein um afskipti opinberra skóla af trúarlífi barna um jólin – skodun.is)