Siðmennt fagnar lagasetningu alþingis sem nýverið samþykkti ein hjúskaparlög fyrir alla – óháð kynhneigð – og gerði með því hjónabönd samkynhneigðra alfarið sambærileg við hjónabönd gagnkynhneigðra. Siðmennt hefur frá því að félagið var stofnað ávallt stutt við bakið á réttindabaráttu samkynhneigðra og því er þetta sérstakt gleðiefni í augum stjórnar Siðmenntar.

Til hamingju með áfangann samkynhneigðir!

Í gærkvöldi föstudaginn 27. júní 2008, héldu Samtökin ’78 uppá 30 ára afmæli sitt með miklum myndarbrag í húskynnum Listasafns Reykjavíkur í Hafnarstræti.  Samtökin ’78 veittu nú í annað sinn mannréttindaverðlaun sín og hlaut Siðmennt þau ásamt Bjarna Karlssyni presti og Böðvari Björnssyni sem var einn af fyrstu meðlimum samtakanna.  Kynningarorð Samtakanna’78 um Siðmennt voru ákaflega falleg og Hope Knútsson veitti verðlaununum viðtöku fyrir hönd Siðmenntar. Í þakkarræðu sinni sagði Hope m.a. að húmanistar um allan heim hefðu alltaf stutt réttindabaráttu samkynhneigðra og að að mörgu leyti væru Samtökin’78 fyrirmynd fyrir okkur.  Hope lýsti því yfir að við í Siðmennt værum djúpt snortin yfir þessari viðurkenningu.  Ræðu hennar var ákaflega vel tekið.  Siðmennt óskar Samtökunum ’78 til hamingju með þrítugsafmælið!