Fréttatilkynning
Samkvæmt fréttum Stöðvar 2 þriðjudaginn 6. mars, þar sem fjallað er um álit menntamálaráðherra á Vinaleið Þjóðkirkjunnar, kemur fram að ráðherra telur ekki að um trúboð sé að ræða. Að auki telur ráðherra að starfsemin stangist ekki á við starf faghópa heldur sé viðbót við þjónustu skólans við nemendur. Þessi afstaða ráðherrans kemur á óvart enda hefur ráðherra ekki enn svarað erindi Siðmenntar frá 3. október 2006, þar sem hann er inntur eftir afstöðu sinni til Vinaleiðar.

Stórn Heimilis og skóla hefur sent frá sér fréttatilkynningu þar sem samtökin svara skólanefndum Álftaness, Garðabæjar og Mosfellsbæjar um þjónustuna Vinaleið.

Í fréttatilkynningunni segir m.a.

„Með tilliti til jafnræðissjónarmiða og með vísan í 2. grein grunnskólalaga, telur stjórn Heimilis og skóla eðlilegra að til framtíðar standi sálgæsluþjónusta Þjóðkirkjunnar börnum og forsvarsmönnum þeirra til boða utan húsakynna skóla, eftir að skóladegi lýkur.“

Nýverið barst Siðmennt bréf frá foreldri grunnskólabarns sem lýsti yfir áhyggjum sínum yfir starfsemi svokallaðar Vinaleiðar Þjóðkirkjunnar í grunnskóla dóttur hennar. Bréf þetta er líkt mörgum ábendingum sem Siðmennt berast reglulega. Móðirin hefur gefið Siðmennt leyfi til að birta frásögn sína og er það gert hér með. Þessa frásögn ásamt fleiri dæmum er einnig hægt að finna á trúfrelsisvef Siðmenntar: www.sidmennt.is/trufrelsi.

Þessi saga er að mörgu leiti áhugaverð, sérstaklega að því leiti að fulltrúar Þjóðkirkjunnar hafa margsinnis komið fram í fjölmiðlum og fullyrt að djáknar eða prestar í grunnskólum fari alls ekki inn í kennslutíma og tali þar við börnin. Siðmennt veit hins vegar um fjölmörg dæmi um þar sem það er einmitt gert.

Siðmennt hefur látið útbúa bækling þar sem fjallað er um helstu ástæðurnar fyrir því af hverju skólar eiga vera lausir frá öllum áróðri eða starfsemi trúfélaga. Öllum er frjálst að prenta þennan bækling út og nota. Bæklinginn er að finna á slóðinni:

http://www.sidmennt.is/trufrelsi/skoli.php