Námskeið í athafnarstjórnun – Siðmennt óskar eftir nemum af landsbyggðinni

Helgina 14-15. maí mun Siðmennt standa fyrir námskeiði í athafnarstjórnun.

Ljósm. Bragi Þór Jósefsson
Ljósm. Bragi Þór Jósefsson

Áhersla verður lögð á að fá nema á námskeiðið sem búsettir eru á landsbyggðinni því að þar sárvantar athafnarstjóra.  Eftirspurn eftir athafnarstjórum í nafngjafir og sérstaklega giftingar hefur aukist mikið síðustu 2 árin úti á landi.  Giftingar í náttúrufegurð landsins njóta vaxandi vinsælda, bæði meðal Íslendinga og erlendra para.  Það vantar athafnarstjóra í alla landsfjórðunga.

Þátttökuskilyrði. Til þess að koma til greina sem nemi í athafnarstjórnun hjá Siðmennt þarf umsækjandi að hafa náð 25 ára aldri og:

  • Eiga samleið í lífsskoðunum með félaginu (sjá stefnuskrá Siðmenntar).
  • Hafa áhuga á athöfnum, mannlegum samskiptum og því að gera athafnardag fólks eftirminnilegan.
  • Búa yfir reynslu í því að koma fram og halda ræður/fyrirlestra.  Skýrmælgi og opna tjáningu.
  • Geta ritað gott mál og skipulegan texta með heimspekilegri nálgun og andríki.
  • Búa yfir sjálfstrausti, hlýleika, yfirvegun, snyrtimennsku, þolinmæði, staðfestu, sveigjanleika og frumkvæði.

Þá er kunnátta í tungumálum (a.m.k. ensku) æskileg.  Fleiri atriði eiga við en þau eru rædd nánar við umsækjendur eftir fyrirspurn/umsókn.

Námskeiðið er í tveimur hlutum:

  1. Fjarkennsla í 4 vikur.  Lesefni vikulega og eitt ritverkefni.  Hefst 17. apríl. (má hefjast viku síðar ef nauðsyn ber til).
  2. Námskeið helgina 14-15. maí.  Viðvera 09-16 báða dagana.  Staðsetning líklega á höfuðborgarsvæðinu. Umsækjendur af landsbyggðinnni fá greiddan ferðakostnað.

Námskeiðsgjald er 0 kr.  Að loknu námskeiði er ákveðin þjálfun sem þarf að uppfylla áður en vígsluleyfi fæst fyrir giftingar.  Ábyrgðarmaður athafna Siðmenntar er Jóhann Björnsson, formaður félagsins.

Námskeiðið beinist aðallega að því að kenna athafnarstjórnun við nafngjafir og giftingar.  Athafnarstjórnun við útfarir er einnig kennd en ekki er ætlast til að athafnarstjóraefni taki þær að sér eftir námskeiðið. Athafnarstjórar Siðmenntar eiga þess einnig kost að stýra athöfnum borgaralegrar fermingar.

Umsóknir (með nafni, kt., heimilisfangi og síma) óskast sem fyrst eða í síðasta lagi 16. apríl.  (undanþágu frá fresti má skoða til 10. maí).  Þær skal senda á athafnir@sidmennt.is

Fagstjóri athafnaþjónustu Siðmenntar og umsjónarkennari námskeiðsins er Svanur Sigurbjörnsson.

Framkvæmdastjóri Siðmenntar og rekstrarstjóri athafnaþjónustunnar er Bjarni Jónsson.

Nánari upplýsingar má fá með sendingu fyrirspurnar til Svans/Bjarna á athafnir@sidmennt.is

Upplýsingar um borgaralega fermingu 2017

Staðfestar dagsetningar fyrir borgaralegar fermingarathafnir 2017 eru eftirfarandi:

  • Sunnudaginn 2. apríl 2017 í Háskólabíó í Reykjavík – 3 athafnir, kl 10:30, 12:30 og 14:30. 
  • Sunnudaginn 23. apríl 2017 í Salnum í Kópavogi – 3 athafnir, kl 10:30, 12:30 og 14:30. 
  • Laugardaginn 3. júní 2017 kl 14:00 í Hofi á Akureyri. 
  • Athafnir annars staðar eru ekki enn ákveðnar en möguleiki er á þeim ef næg þátttaka fæst á viðkomandi stöðum.

Skráning í Borgaralega fermingu 2017 hefst síðla sumars 2016 (dagsetning auglýst síðar) og lýkur formlega 15. nóvember.

Sjá nánar á upplýsingasíðu fyrir borgaralega fermingu 2017:

Samræður um lífsskoðanir Íslendinga (myndband)

Sigurður Hólm Gunnarsson, varaformaður Siðmenntar og Hjalti Hugason prófessor í kirkjusögu við guðfræði- og trúarbragðafræðideild HÍ og áhugamaður um samspil trúar, samfélags og menningar í sögu og samtíð, ræða niðurstöður úr könnun Siðmenntar um lífsskoðanir Íslendinga. Sunna Valgerðardóttir, fjölmiðlakona stýrir umræðunum.

Viðburðurinn var haldinn á KEX Hostel mánudaginn 7. mars 2016

Könnun: Opinberir skólar eiga að halda trúarlegu hlutleysi

Flestir Íslendingar eru sammála Siðmennt um að opinberir leik- og grunnskólar eigi að halda trúarlegu hlutleysi. Siðmennt, sem lengi hefur talað fyrir trúarlegu hlutleysi opinberra skóla, hefur ítrekað verið sakað um að tala fyrir hönd „háværs minnihluta“. Ef marka má niðurstöður í könnun Maskínu virðist það þvert á móti vera (hávær?) minnihluti sem er ósammála því að opinberir skólar eigi að halda trúarlegu hlutleysi.

Lesa