P.Z. Myers er þekktur fyrir gagnrýni sína á vitræna hönnun (intelligent design) og sköpunarhyggju (creationism). Myers er handhafi alþjóðlegu Húmanistaviðurkenningarinnar 2011.

Nánari upplýsingar:

Vefsíða Siðmenntar
www.sidmennt.is

Siðmennt á Facebook
www.facebook.com/sidmennt

Vefsíða P.Z. Myers
www.pharyngula.com

—-

Fyrir hönd stjórnar Siðmenntar
Sigurður Hólm Gunnarsson
siggi@sidmennt.is
898-7585

Kynningarfundur verður haldinn í Háskólabíó um miðjan nóvember 2012. Þeir sem hafa þegar skráð sig fá fundarboð á kynningarfundinn.

Staðfestar dagsetningar fyrir borgaralegar fermingarathafnir 2013:

• 14. apríl 2013 í Háskólabíó í Reykjavík - Fyrri athöfn hefst klukkan 11:00, sú seinni klukkan 13:30.
• 21. apríl 2013 í Salnum í Kópavogi – Fyrri athöfn hefst klukkan 11:00, sú seinni klukkan 13:30.
• 12. maí 2013 á Akureyri – Athöfnin hefst klukkan 13:30.

Fara á skráningarsíðu

Umsagnir um borgaralegrar fermingar

Líklegt er að það verði haldið áfram með borgaralega fermingu í Salnum Kópavogi og ef að aðsókn sprengir af sér tvær afthafnir á næsta ári þarf að fjölga þeim.

Hér fara nokkrar myndir frá fyrri athöfninni.

Það var Sigrún Valbergsdóttir sem stýrði henni og Jóhann Björnsson kennari afhenti börnunum viðurkenningarskjölin.

Unga fólkið sem formlega var tekið í fullorðinna tölu flutti ljóð, söng, dansaði og lék á hljóðfæri fyrir stolta aðstandendur og Sigríður Víðis Jónsdóttir, rithöfundur og upplýsingafulltrúi UNICEF á Íslandi, fór með hugvekju. Veðrið lék við okkur í dag sem setti tóninn fyrir vel heppnaða og skemmtilega stund þar sem hæfileikar unga fólksins fengu að njóta sín fyrir framan fullan sal áhorfenda.

Framundan eru fleiri athafnir víða um land, um það má lésa hér: BF 2012 – Upplýsingar

Siðmennt óskar börnunum í borgaralega fermingarárganginum 2012 innilega til hamingju með daginn og vonar að fermingarundirbúningurinn og orðin í fermingarskírteininu verði þeim hvatning til að vera heilsteypt, víðsýnt og hugulsamt fólk.

Við þökkum hjartanlega fyrir samveruna.

Myndir frá athöfnunum í dag fylgja hér á eftir.

Fyrstu 12-vikna vikulegu námskeiðin byrja í 2. viku janúar 2012, nánar tiltekið 9. jan.

Hefur foreldrum og forráðamönnum ungmennanna verið sendur upplýsingapakki núna í desember (póstlagður 15. des) með öllum helstu upplýsingum um námskeiðin, tímasetningum og öðru sem gagnlegt er að komi fram.  Þennan upplýsingapakka er hægt að nálgast hérna á vefnum einnig.

Sjá: BF 2012 – Upplýsingar

Jóhann Björnsson afhendir fermingarvottorð

Í fyrsta skipti í starfi Siðmenntar hefur fjöldi ungmenna sem skráð hafa sig í borgaralega fermingu farið yfir 200.  Mikil aukning hefur verið á þátttöku ungmenna í fermingafræðslu Siðmenntar undanfarin ár.  Árin 2003-2005 voru þátttakendur um 90, árin 2006-2009 um 115 og árið 2010 voru það 162 ungmenni sem völdu þennan kost. Það var stórt stökk og sem endurtók sig síðasta vor þegar  195 ungmenni fermdust á vegum félagsins.  Fyrir borgaralega fermingu 2012 hafa nú  yfir 200 ungmenni skráð sig.  Aukningin á fimm árum er því 85% en þess ber að geta að skráningu lýkur ekki fyrr en 30. nóvember svo búast má við að fleiri bætist í hópinn.  Þetta samsvarar því að 5% af ungmennum á fermingaraldri velji fermingarfræðslu og athöfn Siðmenntar.

Samtímis þessum mikla áhuga hefur athöfnunum fjölgað en þær fara fram á fleiri stöðum á landinu.  Það er ekki lengra síðan en árið 2005 að aðeins ein athöfn fór fram í Háskólabíói með 93 þátttakendum. Árið 2012 verða í boði sex athafnir á fjórum stöðum.  Tvær í Reykjavík, ein á Akureyri en þar verða um 25 ungmenni fermd (sem er 100% aukning frá í fyrra), ein á Selfossi þar sem 6 fermast og síðan tvær athafnir í Salnum í Kópavogi (ríflega 30 í hvorri fyrir sig).

Forráðamenn Siðmenntar eru einstaklega ánægðir með þennan árangur og segir Hope Knútsson, formaður Siðmenntar og skipuleggjandi borgaralegrar ferminga:  „Þessi fjölgun er mjög ánægjuleg og er mikill stuðningur við það gæðastarf sem unnið er af kennurum Siðmenntar undir dyggri stjórn Jóhanns Björnssonar, heimspekings og kennara.  Sú nálgun að ræða við ungt fólk um siðfræði, heimspeki, gagnrýna hugsun, fordóma, sorgarviðbrögð, samskipti kynjanna svo eitthvað sé nefnt hefur sýnt sig falla þeim vel í geð og búa þau undir  aukna ábyrgð í lífinu.“

Ögmundur Jónasson innanríkisráðherra

Ræða innanríkisráðherra við afhendingu viðurkenninga Siðmenntar 3. nóvember 2011

Guðsótti og góðir siðir, segja menn. Óttinn við Guð er upphaf viskunnar. Það kenndi Gamla Testamentið.

En hvað gerist ef óttinn er tekinn út úr jöfnunni? Ef Guð bregður sér frá? Verður þá allt stjórnlaust einsog í barnaskólabekk, þegar kennarinn fer fram? Eða getur verið að réttlætiskennd, heiðarleiki, samúð og kærleikur séu manninum eiginleg? Höfum við samvisku? Hvaðan kemur hún?

Hvert sem svarið er, þá er ljóst að hvorki Guð né ótti er forsenda góðra siða.

Samviskan er okkur ásköpuð og eiginleg og gott uppeldi ræktar hana og þroskar. Og best þroskumst við í óttaleysi. Og kærleika.

Fjöldi fólks velur að lifa án trúarbragða en fæstir myndu kjósa líf án kærleika. Kærleikur er upphaf viskunnar, ekki ótti. Ótti leiðir til vanlíðunar og vondra verka. Nýja Testamentið tekst á við ótta með allt öðrum hætti en Gamla Testamentið og önnur trúarbrögð hafa óþrjótandi svör til þeirra sem spyrja.

En það eru ekki einungis trúarbrögð sem geyma svörin. Sumir leita í smiðju fornra og nýrra heimspekinga, aðrir snúa sér til náttúrunnar og enn aðrir leita fyrst og fremst innra með sér sjálfum. Trú getur verið tengd trúarbrögðum, en hún getur líka verið þeim alls ótengd.

Í hugum sumra er samviskan okkar eigin Guð, röddin sem er innra með sérhverjum manni. Sú rödd getur verið harður húsbóndi, og kannski ekki eins umburðarlyndur og sá gamli afi, sem stundum er teiknaður sem sá Guð sem býr skýjum ofar. Þessi innri rödd er án afláts og getur krafist meira af okkur en lausnir skriftastólsins. En hún getur líka verið ósanngjörn – lituð af viðhorfum sem eru alls laus við kærleika gagnvart okkur sjálfum og gagnvart öðrum.

Um þetta snýst sennilega innri barátta okkar allflestra. Hvernig högum við lífi okkar í samfélagi fólks, dýra og náttúru? Hvernig látum við gott af okkur leiða og til hvers? Sum okkar velja leiðsögn trúarbragða eða samtaka sem sameinast í trú á æðri máttarvöld, önnur leita í veraldlega siðfræði og til hugsuða sem létu jörðina og hið áþreifanlega nægja í leit að svörum. Þannig er til dæmis um það félag sem stendur fyrir þessari samkomu í dag að það kennir sig við húmanisma og frjálsa hugsun, óháð trúarsetningum.

Hvers vegna geri ég þetta að umtalsefni? Jú, vegna þess að allt frá stofnun – eða í rúma tvo áratugi – hefur Siðmennt vakið athygli á þeirri staðreynd að trúarbrögð njóti vissra forréttinda umfram annars konar lífsskoðunarhópa í íslensku samfélagi, nefnilega í gegnum þann lagabókstaf sem tryggir trúfélögum sóknargjöld og veitir þeim heimildir til embættisverka sem hið opinbera hefur annars með höndum.

Óskir Siðmenntar hafa ekki með neinu móti gengið á rétt annarra til að velja sér trú, trúarbrögð eða trúleysi. Þvert á móti hafa ábendingarnar verið á þá lund að jafna stöðu félaga og þannig einstaklinga sem kjósa sér mismunandi vettvang fyrir mannrækt, tilvistarspurningar og andlega þekkingarleit. Ég nefni þetta hér því að nú er til umsagnar á vefsvæði Innanríkisráðuneytisins frumvarp sem jafnar stöðu lífsskoðunarfélaga og trúfélaga. Í framhaldinu verður frumvarpið lagt fram á Alþingi og er það mín von að þingið taki málið föstum tökum þannig að það megi verða að lögum í vetur eða með komandi vori. Það verður ekki fyrr en þá að ég óska Siðmennt til hamingju með árangurinn en færi ykkur nú þakkir fyrir sanngjarna og málefnalega baráttu í þessum efnum.

Segðu mér hverja þú umgengst og ég skal segja þér hver þú ert, segir gamalt orðtak. Þessi hugsun kom upp í huga minn þegar ég fékk boðsbréf á þennan fund Siðmenntar þar sem greint var frá því hverjir hefðu fengið hin árlegu húmanistaverðlaun félagsins frá upphafi þeirra verðlaunaveitingar. Það voru Samtökin 78, Ragnar Aðalsteinsson, Tatjana Latinovic, Rauði Kross Íslands, Alþjóðahús og Hörður Torfason. Og í boðsbréfinu var sagt frá því að nú  væri nýr verðlaunahafi að koma til sögunnar. Sá sem þar var nefndur er að mínu mati vel að viðurkenningu kominn og verður góður vitnisburður um þau gildi sem Siðmennt vill greinilega  í hávegum hafa: Hugrekki og þor, seiglu og staðfestu í baráttu fyrir mannréttindum, baráttu sem krefst þess að setja kærleika og visku í öndvegi; baráttu sem aldrei verður háð með óttann að vopni.

Þá sá ég að til stendur einnig að veita Fræðslu og vísindaviðurekningu. Í fyrra hlaut hana Ari Trausti Guðmundsson, sem í mínum huga sameinar það tvennt að berjast fyrir mannréttindum og sækja inn í framtíðarlendur þekkingarinnar.

Ég óska nýjum verðlaunahöfum til hamingju. Og ég óska Siðmennt alls góðs um alla framtíð.

Fræðslu- og vísindaviðurkenningu Siðmenntar var úthlutað í fjórða sinn. Árið 2008 hlaut Pétur Tyrfingsson sálfræðingur hana, árið 2009 hlaut Orri Harðarson hana og árið 2010 Ari Trausti Guðmundsson. Eitt af megin umfjöllunarefnum félagsins er þekkingarfræðin og stuðningur við vísindalega þekkingarleit og fræðslu. Félagið veitir viðurkenningu þeim aðila eða samtökum sem hafa fært þjóðinni mikilvægt framlag í þessum efnum. Að þessu sinni eru það Stjörnuskoðunarfélag Seltjarnarness og  Stjörnufræðivefurinn sem hljóta viðurkenninguna.

Ögmundur Jónasson, Mannréttindaráðherra, flutti ávarp við upphaf viðburðar.

Ljósmyndir frá viðurkenningarafhendingunni er að finna neðst í þessari færslu.

Hope Knútsson, formaður Siðmenntar, flutti við þetta tækifæri eftirfarandi ræðu:

Húmanistaviðurkenning Siðmenntar 2011

Það er með mikilli ánægju að Siðmennt, félag siðrænna húmanista á Íslandi, veitir í dag, sjöunda árið í röð, húmanistaviðurkenningu Siðmenntar.

Ég vil byrja á því að segja ykkur í stuttu máli frá Siðmennt og fyrir hvað félagið stendur. Siðmennt er tuttugu og eins árs í ár og var formlega stofnað árið 1990. Félagið er málsvari manngildisstefnu (húmanisma) og frjálsrar hugsunar, er óháð trúarsetningum og það stendur fyrir félagslegum athöfnum. Frá 1988 hefur Siðmennt árlega haldið undirbúnings-námskeið og séð um borgaralegar fermingar. Síðan 2008 hefur Siðmennt einnig boðið uppá veraldlegar giftingar, nafngjafir og útfarir. Við teljum það mikilvægt að geta boðið uppá þessa valkosti og höfum við þjálfað athafnarstjóra til þess að annast þessar athafnir. Þá hefur félagið staðið fyrir umræðufundum um ýmis mál er tengjast siðrænum húmanisma. Hefur félagið meðal annars fjallað um trúarbragðakennslu, heimspeki í skólum, mannréttindi samkynhneigðra, um að taka dauðann í sátt, sorg og sorgarviðbrögð, um erlend félög siðrænna húmanista og margt fleira. Helsta baráttumál Siðmenntar í dag er ósk félagsins um jafna stöðu allra trúarbragða og lífsskoðunarfélaga sem m.a. hefur í för með sér aðskilnað ríkis og kirkju á Íslandi og að Siðmennt öðlist sömu lagalega stöðu og önnur lífsskoðunarfélög.

Siðmennt ákvað árið 2005 að veita árlega sérstaka húmanistaviðurkenningu. Það ár hlutu Samtökin ‘78 viðurkenninguna, árið 2006 Ragnar Aðalsteinsson, árið 2007 Tatjana Latinovic, árið 2008 Rauði Kross Íslands, árið 2009 Alþjóðahús og í fyrra veitti Hörður Torfason henni viðtöku.

Einstaklingar, félagasamtök eða aðrir sem hafa lagt talsvert af mörkum í þágu mannréttinda á Íslandi eiga möguleika á að hljóta viðurkenninguna.

Stefna húmanismans birtist m.a. í mannréttindayfirlýsingu Sameinuðu Þjóðanna, en í stefnuskrá Siðmenntar segir m.a.:

Siðmennt reynir að yfirstíga skiptingu manna í fjandsamlega hópa sem hver um sig byggir tilvist sína á ákveðinni sérstöðu, til dæmis kynþætti, trúarbrögðum, kyni, þjóðerni, stétt, tungumálum eða kynhneigð. Siðmennt vill fá fólk úr ólíkum hópum til að vinna saman að málefnum sem eru til góðs fyrir mannkyn allt.

Sá sem hlýtur húmanistaviðurkenningu Siðmenntar 2011 er Páll Óskar Hjálmtýsson. Eftir ýfirlýsingu Páls Óskars á Gay Pride deginum í ágúst tók stjórn Siðmenntar ákvörðun um að heiðra hann með þessum hætti. Einn stjórnarmaður Siðmenntar, Kristinn Theódórsson orðaði þetta svona: Við viljum veita honum viðurkenningu fyrir að hafa árum saman verið áberandi talsmaður þess að fólk eigi fá að vera eins og það er. Að fjölbreytni sé góð, að traðka eigi yfir napurlega fordóma á dansskónum með bros á vör, í stað þess að taka fram hermannastígvélin og stappa í reiði. Hann er fyrirmynd jákvæðrar mannréttindabaráttu sem fer fram á götunum en ekki í réttarkerfinu eða á blogginu. Hann er táknmynd þess meðbyrs sem gay pride gangan nýtur á Íslandi í dag. Hann er fyrirmyndar mannréttindabaráttumaður – án þess að allir eigi að vera eins og hann. Hann er lifandi íkon þess að hægt sé að verða svo vinsæll með jákvæðni og sköpunargleði að fordómar gegn kynhneigð hans hafa horfið í skugga velgengninnar og þannig rutt veginn fyrir aðra til að gera hið sama.

Að okkar mati samrýmist starf Páll Óskars hugmyndum húmanismans eins og lýst hefur verið hér í upphafi. Það er mér því mikil ánægja að veita Palla Húmanistaviðurkenningu Siðmenntar árið 2011 fyrir einstakt og óeigingjarnt starf í þágu mannréttinda á Íslandi. Húmanistaviðurkenning Siðmenntar er táknræns eðlis og samanstendur af viðurkenningarskjali og hógværri gjöf sem er listaverk eftir Elísabetu Ásberg og heitir “Flæði”.

Ég óska elsku Palla til hamingju!

Fræðslu- og vísindaviðurkenning Siðmenntar 2011

Í dag mun Siðmennt einnig veita Fræðslu-og vísindaviðurkenningu félagsins fyrir mikilvægt framlag í þágu fræðslu á Íslandi. Þetta er í fjórða sinn sem Siðmennt veitir þessa viðurkenningu. Fyrrum handhafar þessar viðurkenningar eru Pétur Tyrfingsson sálfræðingur árið 2008, Orri Harðarson rithöfundur og tónlistarmaður árið 2009 og Ari Trausti Guðmundsson rithöfundur og jarðvísindamaður í fyrra.

Ég vil byrja á því að segja hvers vegna Siðmennt lætur sig varða fræðslumál og upplýsta umræðu á Íslandi. Eitt af þremur meginviðfangsefnum félagsins er þekkingarfræði, sem er ein af undirgreinum heimspekinnar rétt eins og siðfræðin. Innan húmanismans er fjallað um eðli og uppsprettu þekkingar og skyld hugtök eins og skynjun, huglægni, hlutlægni, raunhyggju, rökhyggju og afstæðishyggju.

Í stefnu félagsins segir:

Siðmennt telur að uppgötvanir í vísindum og nýjungar í tækni geti stuðlað að betra lífi. Þróun siðferðis þarf að vaxa jöfnum skrefum með þróun vísinda og þau þarf að nota til uppbyggingar, en ekki niðurrifs og eyðileggingar. Húmanisminn tekur mið af því að áreiðanleg þekking um okkur sjálf og heiminn verði til við stöðugt ferli athugunar, rannsóknar og endurskoðunar. Vísindin gefa okkur aðferðir og tæki, en mannleg siðferðisgildi verða að vísa leiðina.

Siðmennt hvetur til gagnrýnnar hugsunar og telur að nýjar hugmyndir eigi að standast fræðilega rannsókn; að öðrum kosti eigi að vantreysta þeim.

Tveir aðilar sem hafa starfað mikið saman, Stjörnuskoðunarfélag Seltjarnarness og Stjörnufræðivefurinn hafa lagt fram ótrúlega mikinn kraft og mikla hugsjón í þágu vísinda og þekkingar í íslensku samfélagi. Stjörnuskoðunarfélagið er 35 ára gamalt í ár. Félagið hefur aflað fjár til að kaupa og dreifa 300 sjónaukum til rúmlega 220 grunn-og framhaldsskóla ásamt heimildarmynd sem heitir “Eyes on the Skies” framleitt af European Space Agency, the European Southern Observatory og the International Astronomical Union. Ennfremur gerðu félagsmenn Stjörnuskoðunarfélagsins þýðingartexta fyrir myndina og heimsóttu rúmlega 150 skóla um allt land. Félagið bauð upp á námskeið fyrir kennara um notkun sjónauka og ráð um hvernig væri hægt að gera kennslu í stjörnufræði spennandi. Fyrir tveimur árum síðan hélt félagið ljósmyndasýningu undir berum himni á Skólavörðuholtinu með 26 stórar hrífandi myndir af alheiminum. Stóð sýningin yfir í 5 vikur. Mér finnst þetta framtak virkilega magnað!

Fyrir þetta stórkostlega framlag til fræðslu almennings á Íslandi vill stjórn Siðmenntar veita Stjörnuskoðunarfélagi Seltjarnarness og Stjörnufræðivefnum Fræðslu- og vísindaviðurkenningu Siðmenntar fyrir árið 2011.

Við búum í samfélagi vísinda og tækni en samtímis búum við í samfélagi þar sem ríkir því miður mikil fáfræði og töluvert áhugaleysi um vísindi. Það vantar sárlega fleiri vísinda- og tæknimenntað fólk á Íslandi, en til þess þarf að vekja áhuga fólks á vísindum. Þetta er lykilatriði. Stjörnskoðunarfélagið og Stjörnufræðivefurinn standa sig prýðilega í þessu samhengi.

Mín er ánægjan að afhenda formanni Stjörnuskoðunarfélagsins og ritstjóra Stjörnufræðivefsins Sævari Helga Bragasyni fræðslu-og vísindaviðurkenningu Siðmenntar 2011. Félagið fær viðurkenningarskjal og Siðmennt hefur gefið formanninum flugmiða til Íslands til að geta tekið á móti viðurkenningunni fyrir hönd félagsins og til að vera með okkur í dag til að gleðjast saman.

Til hamingju stjörnuskoðunarmenn!

-

Ljósmyndir frá viðburðinum – Kristinn Theódórsson myndaði:

Laugardaginn 12. nóvember 2011 kl. 11:00 – 12:30, í sal 1 í Háskólabíói

Á kynningarfundinum verður næsta fermingarnámskeið Siðmenntar kynnt. Ennfremur verður greint frá fyrirkomulagi væntanlegrar athafnar næsta vor og sýnt verður kynningarmyndband frá athöfnunum sem haldnar voru vorið 2011.