Archive for maí, 2011

Ekkert verður af fyrirlestri Ann Druyan 26. maí vegna eldgoss

Ann_Druyan_featured
24. maí 2011 - Stjórn Siðmenntar

Eldgosið í Grímsvötnum hefur haft þau áhrif á millilandaflug að ekkert verður af fyrirlestri Ann Druyan 26. maí. Ann Druyan, sem nú er stödd í Bandaríkjunum, vonast til að geta komið síðar til Íslands.

 

 

Aðskiljum ríki og kirkju – Hvatning til stjórnlagaráðs

Dómkirkjan og Alþingi
11. maí 2011 - Stjórn Siðmenntar

Við undirrituð hvetjum stjórnlagaráð að bera fram sérstaka tillögu um afnám 62. greinar stjórnarskrár Íslands og afnema þar með ákvæði um sérstaka vernd Þjóðkirkjunnar. Við teljum að stjórnarskrá Íslands eigi að tryggja jafnrétti og fullt trúfrelsi einstaklinga óháð trúar- eða lífsskoðunum þeirra.

Mikill meirihluti hlynntur aðskilnaði ríkis og kirkju.
Frá árinu 1993 hafa skoðanakannanir ítrekað sýnt að mikill meirihluti Íslendinga er hlynntur aðskilnaði ríkis og kirkju. Samkvæmt könnun Capacent frá 2010 kemur í ljós að „Ríflega 73% þeirra sem taka afstöðu annað hvort með eða á móti aðskilnaði ríkis og kirkju segjast nú hlynnt honum en tæplega 27% eru andvíg aðskilnaði.“* Er þetta sambærileg niðurstaða og fékkst 2009 en þá kom enn fremur fram að 70% þeirra sem tilheyra Þjóðkirkjunni eru hlynntir aðskilnaði ríkis og kirkju.

Í stuttu máli er mikill meirihluti allra Íslendinga, óháð trúarafstöðu, lífsskoðun eða trúfélagsskráningu hlynntur aðskilnaði ríkis og kirkju.

Leyfum þjóðinni að kjósa
Þó að mikill meirihluti Íslendinga vilji aðskilja ríki og kirkju telja undirrituð að vænlegast sé að stjórnlagaráð leggi fram sérstaka tillögu um afnám 62. greinar stjórnarskrárinnar sem verður síðan lögð undir dóm kjósenda í þjóðaratkvæði samfara kosningu um nýja stjórnarskrá. Þannig getur almenningur kosið sérstaklega um aðskilnað ríkis og kirkju óháð öðrum tillögum stjórnlagaráðs.

Undirrituð:
Aðgerðir til aðskilnaðar ríkis og kirkju (AARK).
Ásatrúarfélagið.
Búddistasamtökin SGI á Íslandi.
Séra Hjörtur Magni Jóhannsson, prestur og forstöðumaður Fríkirkjunnar við Tjörnina.
Samtök um aðskilnað ríkis og kirkju (SARK).
Siðmennt – félag siðrænna húmanista á Íslandi.
Vantrú.

Nánari upplýsingar veita frekari Friðrik Þór Guðmundsson í síma 864 6365 og Sigurður Hólm Gunnarsson, í síma 898 7585.

Heimild:
*Capacent
SARK – Samtök um aðskilnað ríkis og kirkju greiddu fyrir þessa auglýsingu.

Ann Druyan fjallar um vísindi, trúarbrögð og Carl Sagan

Ann_Druyan_featured
9. maí 2011 - Sigurður Hólm Gunnarsson

ATH: Fyrirlestur Ann Druyan fellur niður vegna eldgoss!

Fimmtudaginn 26. maí flytur Ann Druyan fyrirlestur um vísindi, trúarbrögð og Carl Sagan. Fyrirlesturinn verður haldinn í Háskólanum í Reykjavík (Bellatrix) og hefst klukkan 20:00.

Aðgangur ókeypis og allir velkomnir.

Ann Druyan er bandarískur rithöfundur, fyrirlesari og framleiðandi sjónvarpsþátta. Hún hefur fjallað mikið um áhrif vísinda og tækni á siðmenningu okkar. Druyan skrifaði ásamt eiginmanni sínum heitnum, geimvísindamanninum og húmanistanum Carl Sagan, handritið að Cosmos sjónvarpsþáttunum. Þessir þættir nutu mikilla vinsælda, unnu til fjölmargra verðlauna og voru sýndir í
meira en 60 löndum.

Erindi hennar heitir „At Home in the Cosmos“

Ann Druyan kemur til Íslands á vegum Siðmenntar í samstarfi við Háskólann í Reykjavík og heldur fyrirlestur um togstreituna á milli vísinda og trúarbragða og þau áhrif sem Carl Sagan hafði á almenna þekkingu og umræðu um vísindi.


Í tilefni Dags tjáningarfrelsisins

fjolmidlar
6. maí 2011 - Stjórn Siðmenntar

Fréttatilkynning Siðmenntar sem send var fjölmiðlum á Degi tjáningarfrelsisins 3. maí 2011:

Stjórn Siðmenntar, félags siðrænna húmanista á Íslandi, lýsir yfir verulegum áhyggjum af þeirri aðför gegn tjáningarfrelsi sem virðist eiga sér stað í þjóðfélaginu. Undanfarin misseri hafa fréttamenn og fjölmiðlar þurft að verja sig gegn málshöfðunum eða hótunum þar um, vegna iðkun málfrelsisins við skrif sín og birtingar frétta um ýmis málefni í þjóðfélagsumræðunni.

Tjáningarfrelsið er eitt af mikilvægustu réttindum hvers manns og hvers konar tilraunir til þess að hefta það eða reyna að hafa áhrif á fréttamenn sem og aðra einstaklinga frá því að tjá sig er tilræði við grundvallarmannréttindi.

Krafan um aukið lýðræði og upplýsingar, gegnsæi og opnari umræðu hefur leitt af sér aukna áræðni fréttamanna til að fjalla um spillingu og óeðlileg tengsl manna á milli sem hafa leitt af sér leyndarhyggju og ógegnsæi. Í þeirri vegferð fréttamanna koma ýmsar upplýsingar í ljós sem stríða gegn réttlætiskennd manna, en hafa hingað til ekki verið opinberaðar. Oft er brugðist við með málshöfðun eða hótunum í þeim eina tilgangi, að því er virðist að þagga niður í gagnrýnisröddum. Siðmennt hvetur því alla sem unna mannréttindum að verjast tilraunum til þöggunar, styðja við frjáls skoðanaskipti og verja mikilvægustu réttindi hvers manns, að tjá sig.

Reykjavík 3. maí 2011

 

Login